මා මුලින් ම තෙල් බැම්මට අසු වූ දා මට අද මෙන් මතක තිබේ. එවක බණ්ඩාරනායක නේවාසිකාගාරය ඉදිරි පිට යකඩ වැට පටන් ගන්නා කෙළවරේ මොකක් දෝ රූස්ස ගහක් තිබිණි. කුණු සින්නන් තෙල් බැම්මේ දී කියන කුණු හරුප ඉවසා දරා වාවාගත නොහී දෝ පසු කලෙක ඒ මහා වෘක්ෂ රාජයා මුලින් ඉදිරී වැටිණි. මා මුලින් ම කුණු සින්නකුට අසු වූයේ අන්න ඒ මහා වෘක්ෂ රාජයා පා මුල දී ය. උදේ අටට පමණ පටන් ගන්නා දේශනයකට සහභාගී වීම සඳහා මම අඩියට දෙකට දේශනා ශාලාව බලා දුවමින් සිටියෙමි. ඒ වන විට මා වේවැල්දූව පාර සොයාගෙන නොතුබුණු බැවින් ආවේ ගියේ කවුරුනුත් සරසවි යන එන ඉස්සරහ පැත්තෙනි. මා එනු දැක "ඒයි, ෆස්ට් ඉයර්, මෙහෙ වරෙන්" කියා කුණු සින්නෙක් මා ඔහු ළඟට කැඳවී ය. මම ඒකාට කීකරු වුණෙමි.
"ගුඩ් මෝනිං" කුණු සින්නා මට ආචාර කෙළේ ය. මම ද පිළිතුරු විසින් "ගුඩ් මෝනිං" කීවෙමි. "මල්ලි, උඹේ ගම කොහේ ද?" හේ ඉතා ආදරයෙන් ඇසී ය. "ගාල්ලේ" මම කීවෙමි. "ගෙදර ඉන්නේ කවුරු කවුරු ද?" ඒ ඊළඟ ප්‍රශ්නය යි. "අම්මයි තාත්තයි මමයි" මට පිළිතුර හමාර කරන්නට ලැබුණේ නැත. කුණු සින්නා හෙණ පතයක් ගැසුවා සේ පුපුරා පැන්නේ ය. "ඈ යකෝ, උඹලෑ ගෙදර තාත්තට වඩා අම්මා වැඩිමල් ද? කියපං හු** හරි පිළිවෙළට!" හේ ගුගුළේ ය. "තාත්තයි අම්මයි මමයි" මම ඔහු කැමැති පිළිවෙළට උත්තරය හරි ගැස්සුවෙමි. "තාත්තා මොක ද කරන්නේ?" ඒ ඊළඟ ප්‍රශ්නය යි. "තාත්තා ක්ලාක් කෙනෙක්. දැන් විශ්‍රාමික යි" ඒ පිළිතුරෙන් ඔහු සෑහීමකට පත් වූ බවක් පෙනිණි. යම් හෙයකින් තාත්තා විධායක ශ්‍රේණියේ රැකියාවක් කෙළේ නම් ඒ කුණු සින්නා ගෙන් මා වරුවක් හමාරක් කුණු හරුප අසනවා නියත ය.
කුණු සින්නා ගේ ඊළඟ ප්‍රශ්නය මගේ අධ්‍යාපනය ඉතිහාසය ගැන යි. "කොහේ ද ඉස්කෝලෙ?" හේ පිළිවිසී. "රිච්මන්ඩ්" මම මෝඩ කමට ඇත්ත ම කීවෙමි. රෝයල්, තෝමස්, ආනන්ද, නාලන්ද, ඩී. එස්., රිච්මන්ඩ්, මහින්ද, කිංග්ස්වුඩ් ඔවුනට කනේ යවුල් අනින්නා සේ බව මම එවක නො දත්තෙමි. "ආ උඹ රිච්මන්ඩ් ද?" යනුයෙන් පටන් ගත් කුණු සින්නා රතිඤ්ඤා වැලක් පුපුරන්නා සේ කුණුහරුප වැලක් ම කියාගෙන ගියේ ය. ජීවිතයේ අන් කිසි දාක කිසි වරදක් නො කොට මා එතරම් කුණුහරුප අසා තුබුණේ නැත. මට මහත් අප්පිරියාවක් දැනෙන්නට විය. "උඹ රිච්මන්ඩ් එකේ ඉගෙනගත්තට කමක් නෑ. මෙහෙ ඇවිල්ලා ගැට්ට තියාගන්න එපා" කුණුහරුප වැල අහවර කරමින් හේ කීවේ ය. "මොනා ද සබ්ජෙට්ස්?" ඒ ඊළඟ පැනය යි. "සිංහල යි ඉංගිරිසි යි වාග්විද්‍යාව යි" මා උත්තරය දී නිමවනටත් කලින් මෙරට යටත් කැරැගෙන සිටි ඉංගිරිසින් කෙරෙහි වූ වෛරය හේ තෙමේ මගෙන් පිරිමසාගත්තේ ය. කුණු සින්නනට ඉංගිරිසි අජීර්ණ බව මට කල්පනා වූයේ එදා ය.
ඔය වනාහි රිච්මන්ඩ් විද්‍යාලයයේ ඉගැනුම ලැබීම නිසා මා කුණු හරුප ඇසූ පළමු වැනි දවස යි. ඊළඟ දවස මීට වඩා රසවත් සිදු වීමෙකි.
No comments:
Post a Comment