ප්‍රවණතා කාරක ප්‍රියන්ත ප්‍රනාන්දු

ප්‍රියන්ත ප්‍රනාන්දු
(1952.09.05 - 2018.05.01)

ජනප්‍රිය ගායක ප්‍රියන්ත ප්‍රනාන්දු අභාව ප්‍රාප්ත වී 2020 මැයි 01 වැනි දාට වසර දෙකක් සැපිරෙයි. මේ සැකෙවි සටහන ඔහු අනුස්මරණය කරනු සඳහා ය.

ශ්‍රී ලාංකේය පොප් ගී සම්ප්‍රදායයේ පුරෝගාමියා වූ සී. ටී. ප්‍රනාන්දු ගේ එක ම පුත්‍ර රත්නය වසයෙන් 1952 සැප්තැම්බර 05 වැනි දා මෙ ලෝ එළි දුටු ප්‍රියන්ත සිංහල ගීත සාහිත්‍යයෙහි ඉතිහාස ගත වන්නේ අනුප්‍රාප්තික ගායක පුත්‍ර සම්ප්‍රදායයේ පුරෝගාමියා හැටියට ය. එ නම් සිය පියා ගේ වියොවින් පසු පියා ගේ ගී ගැයීමට ඉදිරි පත් වූ පළමු වැනි පුත්‍රයා හැටියට ය. ජනප්‍රියත්වයෙහි හිණි පෙත්තෙහි සිටිය දී අකල් මරණයකට ගොදුරු වූ සිය පියාණන් වූ සී. ටී. ප්‍රනාන්දු ගේ ගීත ගැයීමට ප්‍රියන්ත ප්‍රසිද්ධ වේදිකාවට ගොඩ වූයේ 1978 දී ය. එ වක් පටන් 2018 දී මඳ කලක් ගිලන් ව සිට මෙ ලෝ හැර යන තුරු පුරා සතළිස් වසරක් ප්‍රියන්ත සිය රසික ජනයා පිනැවී ය.

මේ සටහනෙහි සිරසෙහි ප්‍රියන්ත හඳුන්වා ඇත්තේ ප්‍රවණතා කාරකයකු හැටියට යි. ප්‍රවණතා කාරකයෙක් යනු අලුත් ප්‍රවණතාවක් ඇති කළ පුද්ගලයෙකි. ප්‍රියන්ත ඇති කළ ප්‍රවණතාව වූයේ ගායකයකු ගේ වියොවින් පසු ඔහු ගේ ගී ගැයීමට පුතකු ඉදිරි පත් වීමේ ප්‍රවණතාව යි. ප්‍රියන්ත ගෙන් ආදර්ශ ලැබ අසූව දශකයේ පටන් ගායක පුතුන් එකා දෙන්නා බැගින් මේ වන විට සුවිශාල පිරිසක් බිහි වී ඇත. එහෙත් ප්‍රියන්ත ඒ සියලු දෙනා අතුරින් ජ්‍යේෂ්ඨතම වෙයි. ඔහු මුලින් ම ගී තැටියක් නිකුත් කෙළේ පියා ගේ අභාවයෙන් මාස හයකට පමණ පසු 1978 දී ය. 'Son of CT' යන නමින් සූරිය සමාගමය නිෂ්පාදනය කළ එහි ගී හතරක් අඩංගු විය. මා ගේ මතකයේ හැටියට ඉන් ගී දෙකක් සී. ටී. ගේ ද අනෙක් ගී දෙක ප්‍රියන්ත ගේ ද විය.

ඉන් මඳ කලකට පසු 1978 දී ම ප්‍රියන්ත සිය දෙ වන ගී තැටිය ද නිකුත් කෙළේ ය. එය 'Son of CT: Priyantha Fernando' නම් වී. ජෙම්ටෝන් සමාගමය නිෂ්පාදනය කළ එහි ගීත දොළොසක් ඇතුළත් විය. ඉන් හයක් ප්‍රියන්ත ගේ ස්වතන්ත්‍ර ගීත ය. ඒ තැටිය සඳහා ඉන්ද්‍රාණි පෙරේරා සමඟ ප්‍රියන්ත ගැයූ 'නිරංජලා කාට දෝ ආදරේ ලු දැන්' ගීතය ඔහු ගේ ප්‍රථම ස්වතන්ත්‍ර යුග ගීතය යි. එ මෙන් ම එ තෙක් ගැයූ සියලු ස්වතන්ත්‍ර ගීත අතුරින් ප්‍රියන්තට ජනප්‍රසාදය ගෙන දුන්නේ ද ඒ ගීතය යි. අජන්‍තා රණසිංහ රචනා කළ ඒ ගීතයට තනුව හා සංගීතය හා සපයා තුබුණේ ක්ලැරන්ස් විජේවර්ධන යි. සී. ටී. ගේ සංගීත සම්ප්‍රදායය අනුයමින් සිංහල පොප් ගීත ක්ෂේත්‍රයට පිවිසි ක්ලැරන්ස් විජේවර්ධන එහි සංගීතඥයා වීම එක් අතෙකින් දෛවෝපගත සිදු වීමෙකි.

සී. ටී. ප්‍රනාන්දු
(1921.01.28 - 1977.10.17)

ප්‍රියන්ත ගේ ජනප්‍රියතම ගීතය වූයේ කැසිති පටයකට ඔහු ගැයූ 'වෙරළේ මුහුදු වැල්ලේ' ය. අජන්තා රණසිංහ රචනා කළ එහි සංගීතය මට මතක හැටියට සරත් ද අල්විස් ගේ ය. ඒ ගීතය කොතරම් ජනප්‍රිය වී ද යත් සතළිස් වසරක් පුරා ප්‍රසංග වේදිකාවේ දී ඔහු ගෙන් රසියන් නිතොර ඉල්ලන ගීතයක් බවට එය පත් විය. ප්‍රියන්ත ගේ සෙසු ජනප්‍රිය ගීත අතර 'දවස ගෙවේ ඔබ තාමත් නෑ ආවේ', 'ඉහළ ගමේ යාළුවේ - පහළ ගමේ යාළුවේ', 'මුතු මැණිකේ කළේ අරන්' ආදි ගීත කිහිපයක් ම වෙයි. එහෙත් අන් බොහෝ ගායක පුත්‍රයනට සේ ම ප්‍රියන්තට ද වැඩියක් ම සිදු වූයේ සිය පියා ගේ ගීත ම නැවැත නැවැත ගැයීමට යි. මේ නිසා කල් යත් ම අලුතින් ස්වතන්ත්‍ර ගීත ගායනා කිරීමට ප්‍රියන්ත එ තරම් උනන්දු නොවීම සිංහල ගීත සාහිත්‍යයේ අවාසනාවෙකි.

හැත්තෑ හතේ දරුවනට සී. ටී. ප්‍රනාන්දු ගේ ගීත හඳුන්වා දීමේ පූර්ණ ගෞරවය ප්‍රියන්තට හිමි වෙයි. සී. ටී. නොකල්හි මෙ ලෝ හැර ගියේ මෙ රටට රූපවාහිණී මාධ්‍යය හඳුන්වාදීමට ඔන්න මෙන්න කියා තිබිය දී ය. ඒ නිසා සී. ටී. ගේ එක දු ගීයක් හෝ රූප මාධ්‍යයට නැඟුණේ නැත. රූප මාධ්‍යය සඳහා සී. ටී. ගේ ගීත පටිගත කැරුණේ ප්‍රියන්ත ගේ හඬත් රුවත් යුක්ත ව යි. ප්‍රියන්ත ගේ ආකර්ෂණීය නර්තන විලාසය නිසා ඒ ගීත වඩාත් ප්‍රාසංගික රූපවාහිණී නිර්මාණ බවට පත් විය. සිය පියාණන් ගේ ගීත නැවැත ගායනා කරමින් ප්‍රියන්ත නිකුත් කළ කැසිති පට කිහිපයෙක් ම වෙයි. 'සී. ටී. උපහාර ගී', 'සීගිරි සුකුමාලියේ', 'මී අඹ වනයේ', 'බිලිඳා නැළැවේ', 'Priyantha Fernando - Nonstop', 'සන්ෆ්ලවර් සමඟ ප්‍රියන්ත ප්‍රනාන්දු', 'සී. ටී. ප්‍රණාම ගී 16', 'මා බාල කාලේ' ඒ අතුරින් ප්‍රමුඛතම කැසිති පට ය.

පුරා සතළිස් වසරක් සිංහල ගීත ලෝලීන් ගේ මනදොළ පිනවමින් දෙස් විදෙස් සංගීත ප්‍රසංග ගණනාවෙක ගී ගැයූ ප්‍රියන්ත ප්‍රනාන්දු 2018 වසරේ මාරතු මස විදේශ සංචාරයක් අතරතුර වකුගඩු අක්‍රිය වීමේ රෝගී තත්ත්වයට පත් වූයේ මඳ කලක් ඔත්පළ ව හිඳ 2018 මැයි 01 වැනි දා සැටපස් වැනි වියේ දී ස්වකීය ජීවන ගීතය නිමා කෙළේ ය. සිය පියාණන් ගේ ද මුත්තණුවන් ගේ ද ගී හඬ මතු පරපුරට ද නොනැසී තිළිණ කරනු පිණිස ප්‍රියන්ත ගේ දෙටු පුත් තිසර ප්‍රනාන්දු ප්‍රමුඛ වීම ප්‍රියන්ත ගේ වියෝවෙන් කම්පාවට පත් රසික ප්‍රජාවට යම් බඳු සහනයෙකි.