Tuesday, April 14, 2015
සුබ අලුත් අවුරුද්දක් වේ වා!
අලුත් අවුරුද්දේ සුබ පතන විට බොහෝ දෙනාට ඇති වන පොඩි අවුල් දෙකක් ගැන මෙසේ ලියන්නට සිත් විය. මේ අවුල ලිහා-ගත් කල වරද්දා-ගන්නේ නැති ව සුබ පැතිය හැකි යි.
පළමු වැනි අවුල මේ 'සුබ' ගැන යි. ශුභ, සුභ, සුබ යන තුන් ආකාරයෙන් මැ මේ වදන දක්නට ලැබේ. ඒ නිසා නිවැරැදි කිමෙක් දැ යි යමකු සිත්හි විචිකිච්ඡාවක් ඉපැදීම සාධාරණ ය. මේ තුන මැ හරි. 'ශුභ' ආවේ සකුයෙනි. 'සුභ' ආවේ පාළියෙනි. ඒ දෙදෙනා හෙළ බසට හැඩගැසුණේ 'සුබ' යනුයෙනි.
දැන් ගැටලුව ඇති වන්නේ කවර තැනක කවර වදන යෙදිය යුතු ද යන්න ගැන ය. එහි දී අප තැකිය යුත්තේ ශ්‍රැති මාධුර්යය යි. 'අලුත් අවුරුද්ද' යන්න හෙළ යෙදුමෙකි. සෞම්‍ය ශබ්ද සංයෝගයක් වන ඒ සමඟ මහාප්‍රාණ හා ශ'කාර වැනි රළු ශබ්ද පෑහෙන්නේ නැත. ඒ නිසා සුදුසු වනුයේ 'සුබ අලුත් අවුරුද්ද' යි. 'නැකැත' යනුත් හෙළ වදනක් නිසා ඒ සමඟ ද යෙදිය යුත්තේ 'සුබ' යන්න යි.
'ශුභ' යන්න යෙදිය යුත්තේ සකුයෙන් ගත් 'ප්‍රාර්ථනා' වැනි වදන් සමඟ යි. 'සුභ' යන්න යෙදිය යුත්තේ පාළියෙන් ගත් වදන් සමඟ යි. පාළි වදන් කට වහරේ මුත් ගත් වහරේ එතරම් නො යෙදෙන නිසා අපි පාළියෙන් ආ 'සුභ' දැනට අමතක කරමු.
දෙ වැනි අවුල අවුරුද්ද අලුත් ද? අළුත් ද? යන්න ගැන යි. D. F. කාරියකරවනයෝ වරක් මේ අවුල ගැන මෙසේ ලියූ හ:
"කලෙක සිට ඇතැම් කැලෑ පත්තරවලත් යකා ගේ රූප පෙට්ටියේත් 'අළුත් අවුරුද්දකට' සුබ පතනු දක්නට ලැබේ. අවුරුද්දට සුබ පැතීම හොඳ ය. එහෙත් සුබ පැතීමට 'අළු' කුමට? අළු ළිබ්බෝක්කේ තුබුණා වේ. අපි අළු නැති ව අවුරුද්දට සුබ පතමු. සුබ අලුත් අවුරුද්දක් වේ වා!"
දැන් අවුල් දෙක මැ ළිහිලා ඉවර යි. ඉතින් ඔබ සැමට 'සුබ' අලුත් අවුරුද්දකට 'ශුභ' ප්‍රාර්ථනා!
Sunday, April 12, 2015
සිංහල භාෂා ව්‍යාකරණ විෂයයෙහි සුචරිත ගම්ලත් ශාස්ත්‍රීය සම්ප්‍රදානය: නිරික්සුම් කිහිපයක්
පසු ගිය අප්‍රේල් පස් වැනි දා බෘහස්පති සරසවියේ පැවැති සුචරිත ගම්ලත් සමරුයෙහි දී අප පැවැත්වූ දෙස්ම ලිපියක් කොට සකසා පුවත්පතෙක පළ කරන ලෙස ඒ දෙස්ම ඇසූ නෑසූ බොහෝ හිතවතුන් ගෙන් ඉල්ලීම් ලැබිණි. ලිපිය සැකැසීමට මඳ කලක් ගත වනු ඇති බැවින් දෙස්මෙහි සැකිල්ල මෙ සේ පළ කෙරෙමු. ලිපිය පමා වීම ගැනැ ඔහු තුමූ අපට සමාව දෙත් වා!
01. නව මත පළ කිරීම
I. සිංහල තද්වර්ගාන්තාදේශ සන්ධිය
 |
| මහාචාර්ය සුචරිත ගම්ලත්හු |
II. කරා/ කරාට, කෙරෙහි/ කෙරේ, කෙරෙන් යන නිපාතවල නිරුක්තිය
නව සිංහල ව්‍යාකරණය 1 (පි. 93)
02. පවත්නා මත අභියෝගයට ලක් කිරීම හා සංශෝධනය කිරීම
I. ස්ත්‍රී ලිංග ආඛ්‍යාත සාධනය
a. ස්ත්‍රී ඒක වචන -උ’ ප්‍රත්‍යයය
b. ස්ත්‍රී ඒක වචන -අ’ප්‍රත්‍යයය
c. උත්තමාර්ථයේ බහු වචනය
d. අතීත කාල ආ’ප්‍රත්‍යය
නව සිංහල ව්‍යාකරණය 3 (පි. 19-25)
II. හෙළ යන වදනෙහි නිරුක්තිය
නව සිංහල ව්‍යාකරණය 1 (පි. 81)
03. පවත්නා මත එක පැහැර ප්‍රතික්‍ෂේප කිරීම
I. අන්‍යාර්ථ සමාසය
නව සිංහල ව්‍යාකරණය 5 (පි. 61)
II. අනම්‍යාදේශය හා -එක්’ ප්‍රත්‍යයය
අ. ආ. ගුණතිලකයන් ගේ සිංහල ව්‍යාකරණයට ලියූ පෙර වදන
- ක. ක. ගනුෂ්ක රන්දුල
Subscribe to:
Posts (Atom)